उनी रुपन्देही ३ को उपचुनावका लागि ९ जना प्रारम्भिक उम्मेदवारमा छनोट भएका थिए । उनी मन्टेश्वरी स्कूल सञ्चालक र मन्टेश्वरी सामानका विक्रेता व्यवसायी समेत हुन् । गणेश पौडेल २०७९ को संघीय संसद चुनावमा रुपन्देही २ का उम्मेदवार हुन् । उनी विभिन्न वामपन्थी दलहरु परिवर्तन गर्दै रास्वपा बनेका हुन् ।

बांकेका अधिकारी शैक्षिक परामर्श केन्द्र र भाषा प्रशिक्षण केन्द्रका सञ्चालक हुन् । मन्जु भुसाल समानुपातिक संघीय सांसद हुन् । निर्माण व्यवसायी समेत रहेकी उनी विगतमा नेपाली कांग्रेस, माओवादी केन्द्र र एमाले हुंदै २०८२ सालमा रास्वपा प्रवेशी गरेकी हुन् ।

गोपाल घिमिरे गत फागुन २१ को चुनावमा रुपन्देही २ बाट प्रतिनिधि सभा सदस्य उम्मेदवारका आकांक्षी थिए । तर सुलभ खरेलले टिकट पाएका थिए ।

सभापतिमा आकांक्षीहरु कतिपयले आगामी प्रदेश सभा सदस्य र स्थानीय तहको उम्मेदवारी सुनिश्चित गर्ने वा पार्टी र सरकारी महत्वपूर्ण नियुक्ति/अवसर लिने रणनीति अनुसार पनि उम्मेदवारको दावी गरेको रास्वपाकै कतिपय नेताहरु बताउँछन् ।

रास्वपाकै कतिपय कार्यकर्ताले प्रतिनिधि सभा सदस्यले समेत प्रदेश सभापति ताक्नु गलत भएको सामाजिक सञ्जालमै लेखेका छन् ।

‘सांसदसंग ५ मिनेट भेटेर आफ्नो क्षेत्रको समस्या र कुरा राखौं भन्दा समय नदिनेहरु पनि प्रदेश सभापतिको उम्मेदवार भन्दै प्रचार गराएको देख्दा अचम्म लागेको छ’–ती कायर्यकर्ताले प्रश्न गर्दै लेखेका छन्–‘जहां पनि अवसर र पद चाहिने यस्तो व्यक्तिवादी चरित्रले पुराना पार्टी भन्दा रास्वपा कसरी फरक भयो ?’ महामन्त्री निलराज अधिकारीले सकेसम्म सर्वसम्मतको प्रयास हुने र नभए निर्वाचनको माध्यमबाट नेतृत्व चयन हुने बताए ।

सभापतिका दावेदार शालिकराम घिमिरेले प्रदेश उपसभापति शालिकराम घिमिरेले उम्मेदवारी मनोनयन दर्तापछि मात्र वास्तविक उम्मेदवार को को हुन् भन्ने यकिन हुने बताए । नेतृत्वमा दावी गर्नु सबैको स्वतन्त्रता भएपनि एक भन्दा बढी जिम्मेवारीमा पार्टी केन्द्रले नै स्पष्ट मार्गनिर्देशन गर्नुपर्ने आवश्यकता रहेको उनी बताउँछन् ।

रास्वपा विधान अनुसार लुम्बिनी समिति ५७ सदस्यीय हुने व्यवस्था छ । रास्वपाको विधान अनुसार पहिलो चरणमा प्रदेश सभापति र प्रदेश सदस्यको निर्वाचन गर्नुपर्दछ । दोस्रो चरणमा पदाधिकारीका लागि छुट्टै मतदान गर्नुपर्ने व्यवस्था विधानमा छ ।

प्रदेश सभापतिमा निर्वाचित हुनका लागि कूल सदर मतको ५० प्रतिशत मत कटाउनु पर्दछ । खसेको मतको बहुमत कसैको पक्षमा नभएमा पहिलो र दोस्रो स्थान मत ल्याउने वीचमा पुन प्रतिस्पर्धा हुनेछ । प्रदेश सभापतिको प्रतिस्पर्धामा २५ प्रतिशत मत कटाउने निकटतम् प्रतिस्पर्धीलाई स्वतः प्रदेश सदस्य हुने व्यवस्था छ ।

प्रदेश समितिमा सभापति, उपसभापति, महामन्त्री, कोषाध्यक्ष प्रवक्ता १/१ र सहमहामन्त्री २ जना (फरक फरक लिङ) को हुने गरी पदाधिकारी गठन गर्ने व्यवस्था छ । सात जना पदाधिकारी मध्ये कोषाध्यक्ष र प्रवक्तालाई प्रदेश सभापतिको सिफारिसमा प्रदेश समितिले मनोनित गर्ने व्यवस्था छ ।

प्रदेश अधिवेशनका लागि केन्द्रीय निर्वाचन विभाग र दुई जना केन्द्रीय प्रतिनिधिसमेत सहभागी हुने केन्द्रीय निर्वाचन विभागका सदस्य सुदन ज्ञवालीले जानकारी गराएका छन् ।

उनका अनुसार प्रदेश समिति, प्रदेशका जिल्ला समिति,प्रदेश समिति माथिका प्रदेशभित्रका केन्द्रीय पदाधिकारी, केन्द्रीय सदस्य, विभागका पदाधिकारी र सदस्य,निर्वाचन क्षेत्रीय समिति संयोजक र सहसंयोजक, स्थानीय तहका सभापति सबै र महानगरबाट ४, उपमहानगरबाट ३, नगरपालिकाबाट २ र गाउंपालिकाको एकजना समेत पार्टी समितिबाट मनोनित भएर आउने प्रतिनिधि समेत अधिवेशनको मतदाता हुने छन् ।

उपसभापति घिमिरेका अनुसार लुम्बिनीको अधिवेशनको प्रतिनिधि संख्या ९ सय हारहारी हुनेछ ।

लुम्बिनीका १२ मध्ये ११ जिल्लामा अधिवेशन

प्रदेशका १२ जिल्लामध्ये पूर्वी रुकुममा अधिवेशन बाहेक अन्यमा अधिवेशन गरेर नयाँ नेतृत्व चयन भएको छ । सांगठनिक रुपमा कमजोर रहेको पूर्वी रुकुमको अधिवेशनको मिति टुंगो लागेको छैन ।

पाल्पा, पश्चिम नवलपरासी र रोल्पामा सर्वसम्मत रूपमा नेतृत्व चयन भएको छ । पश्चिम नवलपरासीमा रवि पाण्डेय, पाल्पामा विष्णु भण्डारी र रोल्पामा बलराम थापा सर्वसम्मत रूपमा सभापतिमा चयन भएका थिए भने अन्य ८ जिल्लामा मतदानमार्फत नेतृत्व टुंगो लागेको हो ।

रुपन्देहीमा महेन्द्र उपाध्याय, अर्घाखाँचीमा सीता पराजुली, गुल्मीमा हरि श्रेष्ठ, कपिलवस्तुमा शिवकुमार सुवेदी, दाङमा किरण खनाल, बाँकेमा विवेककुमार श्रेष्ठ, बर्दियामा शान्ता बुढा क्षेत्री तथा प्युठानमा विकास पोखरेल निर्वाचनमार्फत आएका हुन् ।

कांग्रेस, एमाले, माओवादी केन्द्र लगायतका दल परित्याग गरेर जिल्ला सभापतिमा चुनिनेहरू पनि छन् ।