जनहित अनलाइन, कपिलवस्तु । कपिलवस्तुको बाणगंगा नगरपालिका वडा नम्बर १० मा महिलाहरुको लागि सर्फ बनाउने तालिम सुरु भएको छ । नेपाल राष्ट्रिय उद्योग व्यवसाय महासंघ कपिलवस्तुको आयोजना तथा बाणगंगा नगरपालिका वडा नम्बर १० को आर्थिक सहयोगमा सोमबार देखि १० दिने उक्त तालिम सुरु भएको हो ।
तालिमको सोमबार वडा नम्बर १० का वडा अध्यक्ष यम प्रसाद पोख्रेल र नेपाल राष्ट्रिय उद्योग व्यवसाय महासंघ कपिलवस्तुका अध्यक्ष रविन्द्र पोडेलले उद्घाटन गर्नुभएको छ । महिलाहरुको लागि सिप विकास तालिम अन्तर्गत स्वास्थ्य सरसफाई सङ्ग सम्बन्धित रहेको उक्त तालिममा वडा भित्रका ३० जना महिलाहरुको सहभागिता रहेको महासंघका सचिव मनु रसाइलीले बताउनुभयो ।
कार्यक्रममा वडा सचिव सन्तोष चौधरी, महासंघका केन्द्रिय सदस्य उमानाथ पौडेल, तालिम विज्ञ एवम मणिमुकुन्द सेन उधान बुटवलका प्रमुख अनन्त शिलवाल, माउन्ट एभरेस्ट सहकारीका व्यवस्थापक दिपक खनाल, उद्योग बाणिज्य महासंघ कपिलवस्तुका सल्लाहकार मोहन न्यूपाने लगायतको उपस्थिती रहेको थियो । तालिममा निरु गिरिले प्रशिक्षण गर्नुभएको छ ।
