जनहित अनलाइन, कपिलवस्तु । सरकारले हेटौँडा कपडा उद्योग पुनः सञ्चालनको प्रक्रिया अघि बढाउँदै नेपाली सेनामार्फत परीक्षण उत्पादन सुरु गरेको जनाएको छ। उद्योग, वाणिज्य तथा आपूर्ति मन्त्रालयका सचिव कृष्णबहादुर राउतका अनुसार सरकारले असार १८ गते उद्योग पुनः सञ्चालन गर्ने सैद्धान्तिक निर्णय गरेसँगै आवश्यक बजेट निकासा भइसकेको छ। सचिव राउतले बन्द तथा रुग्ण उद्योगहरूको सम्पत्ति र दायित्वको मूल्याङ्कन ( डीडीए ) प्रतिवेदन तयार भइरहेको जानकारी दिँदै उक्त प्रतिवेदनपछि उद्योग सञ्चालनको मोडालिटी तय गरिने बताउनुभयो। वर्तमान सरकारको १०० दिनको उपलब्धि सार्वजनिक गर्ने क्रममा मन्त्रालयले हेटौँडा कपडा उद्योग पुनः सञ्चालनको काम अघि बढिरहेको जानकारी दिएको हो।