जनहित अनलाइन, कपिलवस्तु । कपिलवस्तु निर्वाचन क्षेत्र नम्बर १ मा नेपाली कांग्रेसले चुनावी गतिविधि तीव्र बनाएको छ । नेता तथा कार्यकर्तासँग भेटघाट र पार्टी सम्पर्क कार्यालय उद्घाटन गर्दै कांग्रेसले चुनावी अभियानलाई तीव्र पारेको हो ।
मंगलबार काङ्ग्रेस कपिलवस्तु क्षेत्रनम्बर १ ले बाणगंगा–६ बैदौलीमा निर्वाचन प्रचारप्रशार सम्पर्क कार्यालयको उद्घाटन गर्दै कांग्रेसका उम्मेदवार अत्तहर कमाल मुसलमानले देशलाई सही निकास दिन र गगन थापालाई प्रधानमन्त्री बनाउन सबै कांग्रेसजन एकजुट भएर चुनावमा होमिन आवश्यक रहेको बताए ।
जेन्जी आन्दोलनपछि देशलाई सक्षम नेतृत्वको खाँचो रहेको उल्लेख गर्दै मुसलमानले कांग्रेसको चुनाव चिन्ह ‘रुख’ मा मतदान गर्न आग्रह गरे । उनले सबै कांग्रेस कार्यकर्ता र समर्थकहरू एक मन भएर अघि बढ्नुपर्नेमा जोड दिए ।
कार्यक्रममा कांग्रेस नेता गणेशबहादुर क्षेत्री र ललित गुरुङले आ–आफ्नो धारणा राखेका थिए । नेपाल विद्यार्थी संघ कपिलवस्तुका जिल्ला सभापति चन्द्रकान्त पोखरेलले कार्यक्रमबारे जानकारी दिएका हुन् ।
