रुपन्देही । सैनामैना नगरपालिकाले छाडा चौपायाको व्यवस्थापनमा गरेको प्रयासले उल्लेखनीय सफलता प्राप्त गरेको छ। नगरक्षेत्र र मुख्य सडकहरूमा छाडा चौपाया हटाउँदा सवारी दुर्घटना र जामका समस्या न्यून भएको छ।
कपिलवस्तुको वाणगंगा नगरपालिकासँगको सहकार्यमा कोठी जंगलमा छाडा चौपायाका लागि आधारभूत सुविधा—विजुली, पानी, र घाँस—सहित सुरक्षित क्षेत्रको व्यवस्था गरिएको छ। यसले छाडा चौपायाका कारण उत्पन्न समस्यालाई दीर्घकालीन समाधान गर्ने आधार तयार गरेको छ।
नगरप्रमुख फणेन्द्र प्रसाद शर्माले जनताबाट छाडा चौपायासम्बन्धी सूचना संकलनलाई प्रोत्साहन गर्दै यस अभियानलाई प्रभावकारी बनाउन प्रतिबद्धता जनाएका छन् । करिब दुई महिना अघि सुरु गरिएको यो व्यवस्थापन प्रक्रिया स्थानीय तहमा समस्या समाधानका लागि सक्रिय कदमको उदाहरण हो ।
