रोल्पा । रोल्पा जिल्ला अदालतमा दर्ता भएका मुद्दामध्ये सम्बन्ध विच्छेदका सबैभन्दा बढी छन् । अदालतमा दर्ता भएका करिब ६ सय मुद्दामध्ये ३ सय २६ वटा सम्बन्ध विच्छेदका छन् । तीमध्ये चालू आर्थिक वर्षमा २ सय ७५ वटा मुद्दाको फैसला भइसकेको छ भने अब ५१ वटा मात्रै मुद्दा बाँकी छन् ।
रोल्पा अदालतका स्रेस्तेदार शिव पराजुलीका अनुसार अदालतका फौजदारी भन्दा देवानी मुद्दा दर्ता बढी हुने गरेको छ । धेरै वर्षदेखि नै देवानी मुद्दामध्ये सम्बन्ध विच्छेदका मुद्दा बढी दर्ता हुने गरेको पाइएको उनले बताए । केही वर्षयता सम्बन्ध विच्छेदका मुद्दाको फैसला छिटो हुने गरेको छ । सम्बन्ध विच्छेदका मुद्दा दर्ता गराउन आउनेहरुमध्ये कम उमेरका किशोरीहरुको संख्या बढी भएको उनले बताए ।
अदालतले छिटो छरिता न्याय प्रदान गर्ने उद्देश्य लिएकाले पुराना मुद्दा छैनन् । अदालतमा दुई वर्ष नाघेको मुद्दा नराखिएको र हाडनातामा जबरजस्ती करणी सम्बन्धीको एउटा मुद्दामा विधिविज्ञान प्रयोगशालाबाट परीक्षण प्रतिवेदन आउन बाँकी रहेकाले १८ महिना पुगेको एउटा मुद्दा रहेको अदालतले जनाएको छ ।
आर्थिक वर्षमा गरिएका कार्यहरुको प्रगति सुनाउन आयोजित पत्रकार भेटघाटमा जिल्ला न्यायाधीश खिमानन्द भुसालले उच्च प्राथमिकता दिएर न्याय प्रदान गर्न अदालत लागिपरेको बताए । ‘न्याय छिटो छरितो प्रदान गर्नुपर्छ । कानुन यस्तो चीज हो, यो नभई पनि नहुने र नजिक ल्याउन पनि नहुने हो ।’ उनले भने । राज्यद्वारा एकीकृत रुपमा पालना गर्न ल्याइएको नियम नै कानुन भएकाले न्यायालयले न्याय प्रदान गर्न ढिलो गर्न नहुने उनको धारणा छ ।
