कपिलवस्तु । कपिलवस्तुको बाणगंगा नगरपालिका–४, जितपुरमा अवस्थित ब्राइट लुम्बिनी इन्टरनेश्नल एजुकेशन प्रालिले जापानिज भाषा अध्ययनरत विद्यार्थीहरूका बीच हाजिरीजवाफ प्रतियोगिता सम्पन्न गरेको छ। विद्यार्थीहरूको भाषिक क्षमता अभिवृद्धि गर्ने उद्देश्यसहित शुक्रबार आयोजित उक्त प्रतियोगिता शैक्षिक वातावरणमा उत्साहपूर्ण रूपमा सम्पन्न भएको हो।
संस्थामा जापानिज भाषा अध्ययन गरिरहेका विद्यार्थीहरूको सिकाइ प्रक्रियालाई अझ प्रभावकारी, व्यवहारिक र प्रतिस्पर्धात्मक बनाउने लक्ष्यका साथ कार्यक्रम आयोजना गरिएको संस्थाका प्रबन्धक असिम क्षेत्रीले जानकारी दिए। हाजिरीजवाफ प्रतियोगितामार्फत विद्यार्थीहरूमा भाषा सम्बन्धी ज्ञान, आत्मविश्वास, तत्काल प्रतिक्रिया क्षमता तथा टोलीभाव विकास गर्न सहयोग पुगेको उनको भनाइ छ।
प्रतियोगितामा सहभागी विद्यार्थीहरूले जापानिज भाषा, संस्कृति तथा सामान्य ज्ञानसँग सम्बन्धित प्रश्नहरूको उत्तर दिएका थिए। प्रतिस्पर्धात्मक मूल्यांकनका आधारमा प्रथम, द्वितीय र तृतीय स्थान हासिल गर्न सफल विद्यार्थीहरूलाई पुरस्कार तथा प्रमाणपत्र प्रदान गरिएको थियो। पुरस्कार वितरण समारोहमा संस्थाका व्यवस्थापन पक्ष, प्रशिक्षक तथा विद्यार्थीहरूको उल्लेखनीय उपस्थिति रहेको थियो।
कार्यक्रमलाई सम्बोधन गर्दै प्रबन्धक क्षेत्रीले सफल विद्यार्थीहरूलाई बधाई दिँदै प्रतियोगितामा सहभागी सम्पूर्ण विद्यार्थी तथा प्रशिक्षकप्रति हार्दिक धन्यवाद व्यक्त गरे। उनले यस्ता शैक्षिक क्रियाकलापले विद्यार्थीहरूको समग्र व्यक्तित्व विकासमा महत्वपूर्ण भूमिका खेल्ने उल्लेख गर्दै आगामी दिनमा पनि विविध शैक्षिक तथा सीपमूलक कार्यक्रमहरू निरन्तर सञ्चालन गरिने प्रतिबद्धता जनाए।
ब्राइट लुम्बिनी इन्टरनेश्नल एजुकेशन प्रालि जापानिज भाषा शिक्षासँगै वैदेशिक अध्ययन तथा रोजगारीसम्बन्धी परामर्श प्रदान गर्दै आएको संस्था हो। यस किसिमका शैक्षिक गतिविधिले संस्थाको गुणस्तरीय शिक्षा प्रतिको प्रतिबद्धता र विद्यार्थीकेन्द्रित दृष्टिकोणलाई थप उजागर गरेको छ।
